Нишони миллӣ
Парчами миллӣ
Суруди миллӣ
г. Душанбе, ул. Рудаки 100, офис 15
Июн 6, 2026 ш. Душанбе
«Дар ҷаҳони муосир танҳо кишварҳое метавонанд ҳастии худро ҳифз карда, рушд ёбанд, ки шаҳрвандонашон дорои сатҳи баланди саводнокӣ ва маърифату фарҳанг, илмдӯсту донишманд ва соҳибҳунар бошанд.»
(Эмомалӣ Раҳмон)
Боиси хушнудӣ ва сарфарозист, ки толибилмону омӯзгорони муассиса дар пайгирӣ аз сиёсати маорифпарваронаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон камари ҳиммат баста, пайваста дар озмунҳои ҷумҳуриявӣ дастболо мегарданд. Ин навбат, хонандагони литсей дар даври ноҳиявии озмуни ҷумҳуриявии «Илм — фурӯғи маърифат» аз рӯи 8 номинатсия иштирок намуда, ба гирифтани 16 ҷойи ифтихорӣ: 2 мақоми аввал, 3 мақоми дуюм ва 11 мақоми сеюм ноил гардиданд, ки аз таваҷҷуҳи хонандагон ба фанҳои табию-риёзӣ ва дар амал татбиқ намудани «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» дар муассиса гувоҳӣ медиҳад.
Санаи 4-июн, дар толори фарҳангии Донишгоҳи техникӣ ба номи академик М. Осимӣ маросими ҳавасмандгардонии ғолибони даври ноҳиявии озмуни ҷумҳуриявии «Илм — фурӯғи маърифат» дар ноҳияи Шоҳмансур» баргузор гардид, ки хонандагони муассиса дар қатори дигар ғолибон бо «Диплом» ва мукофотпулӣ ва омӯзгорони онҳо бо мукофотпулӣ аз ҷониби Мақомоти иҷроияи ҳокимияти давлатии ноҳияи Шоҳмансур қадрдонӣ гардиданд.
Ҳамзамон, муассиса барои саҳми арзанда ва иштироки фаъолона дар озмуни мазкур бо «Сипоснома»-и Раиси ноҳияи Шоҳмансур сарфароз гардид.
Бояд қайд намуд, ки Озмуни ҷумҳуриявии “Илм — фурӯғи маърифат”, ҳамасола бо ташаббус ва таҳти сарпарастии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади рушди тафаккури техникӣ, тарғиби ҷаҳонбинии илмӣ, дастрасӣ пайдо кардан ба техникаву технология, тавсеаи ихтироъкорӣ ва навоварӣ ва пайвасти илм бо истеҳсолот, ҷалби бештари хонандагону донишҷӯён ба омӯзиши фанҳои риёзӣ, дақиқ ва табиӣ, ҳамчунин, дарёфт ва муаррифии истеъдодҳои нав ва ҷиҳати дар амал татбиқ намудани «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» баргузор карда мешавад.
Маъмурияти МДТ «Литсейи №4 барои хонандагони болаёқати шаҳри Душанбе» пирӯзии шоистаи хонандагону омӯзгорони муассисара самимона табрику муборакбод намуда, ба онҳо дар ҷодаи илму дониш ва дар давраҳои минбаъдаи озмун музаффариятҳои назаррасро таманно менамояд!
Суратгузориш аз маросими ҳавасмандгардонии хонандагону омӯзгорони муассиса!
ШОМИЛ ШУДАНИ МУАССИСА БА 10-ГОНАИ БЕҲТАРИН МУАССИСАҲОИ ТИПИ НАВ: ЛИТСЕЙ ВА ГИМНАЗИЯҲО ДАР СОЛИ 2026
Санаи 27-уми феврал, дар пайгирӣ аз сиёсати маорифпарваронаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Мактаби бачагонаи санъат ба номи Одина Ҳошим бо иштироки муовини Раиси шаҳри Душанбе, сарпарасти соҳа муҳтарам Одилзода Дилбар Раҳим ва сардори Сарраёсати маорифи шаҳри Душанбе муҳтарам Исмоилзода Баҳром Мансур маросими ҷамъбаст ва ҳавасмандгардонии ғолибони даври сеюм (шаҳрӣ)-и олимпиадаи фаннӣ баргузор гардид.
Боиси хушнудист, ки маротибаи дуюм муассиса аз рӯи маҷмӯи медалҳо дар даври шаҳрии Олимпиадаҳои фаннӣ бо 30-ҷои ифтихорӣ ба 10-гонаи беҳтарин муассисаҳои таълимии типи нав: литсей ва гимназияҳо қарор гирифт. Бо ҳамин тариқ, ба дастаи олимпии литсей аз тарафи кумитаи тадорукоти олимпиада ҷоиза тақдим карда шуд.
Ҳамзамон, хонандагони синфҳои 5-6 ва 11-муассиса ҷиҳати ғолибият дар даври шаҳрии Олимпиадаҳои фаннӣ бо медал ва диплом сарфароз гардонида шуданд.
Маврид ба зикр аст, ки шумораи ғолибони муассиса дар озмуну олимпиадаҳои фаннӣ аз ҳисоби хонандагони боистеъдоду фаъол зиёд гардида, ба натиҷаҳои назаррас ноил мегарданд, ки ин ҳама заҳматҳои омӯзгорон ва хонандагони муассиса мебошад, ки дар пайравӣ аз сиёсати хирадмандона ва маорифпарваронаи Пешвои Миллат, Президенти Ҷумҳурии Тоҷикистон муҳтарам Эмомалӣ Раҳмон дар талошу омӯзиши илму дониш камари ҳиммат бастаанд.
Дастоварди навбатии муассисаро ба кулли омӯзгорону таълимгирандагони муассиса табрику муборакбод намуда, дар фаъолияти илмуву эҷодияшон барору комёбӣ таманно менамоем
7 марти соли ҷорӣ, бо иштироки омузгорон ва духтарони муассиса бахшида ба Рӯзи Модар чорабинии тантанавии идона баргузор гардид.
Ба ифтихори Рӯзи модар озмуни «Канӣ, духтарон!» баргузор гардид.
Озмуни «Канӣ, духтарон!» аз рӯи шартҳои зерин баргузор гардид: Саломнома, намоиши либосҳои миллӣ, ороиш ва парвариши мӯй, видеоролики беҳтарин дар васфи Модар, тайёр намудани оши бурида ва хондани суруди алла, ки иштирокчиён дар ҳар як бахш маҳорату ҳунар, истеъдод ва донишу фарҳанги худро хело хуб нишон доданд.
Дар МДТ Литсейи №4 барои хонандагони болаёқати шаҳри Душанбе чорабинии идонаи Наврӯзи байналмилалӣ бо шукуҳу шаҳомати хоса таҷлил гардид.
Чорабиниро директори муассиса Аминзода М.Ф ифтитоҳ намуда, таъкид кард, ки ҷашни Наврӯз яке аз ҷашнҳои қадимтарин ва ҳамчун шиносномаи мардуми ориёӣ, махсусан миллати тоҷик, ба ҳисоб меравад.
Барномаи фарҳангӣ бо намоиши баҳории кӯдакон ва рақси гурӯҳии онҳо оғоз гардида, сипас бо саҳначаҳои ҷолиб бо иштироки Баҳор, Бобои Деҳқон ва арӯсбиёрон идома ёфт. Аз ҷониби хонандагон сурудҳои дилнишин ва рақсҳои мавзун иҷро гардида, инчунин шеърҳои пурмазмуну таъсирбахш дар васфи Наврӯз ва баҳор қироат карда шуд, ки ба чорабинӣ ҳусни хос зам намуданд.
Дар анҷоми чорабинӣ як қатор хонандагони фаъол бо сипосномаҳо ва ифтихорномаҳо қадрдонӣ гардиданд.
Дар шаҳри Куала-Лумпури Малайзия маросими ифтитоҳи Олимпиадаи байналмилалии «Brainiacs» бо иштироки дастаҳои зиёда аз 20 давлати ҷаҳон дар фазои тантанавӣ баргузор гардид.
Дастаҳои мунтахаби Ҷумҳурии Тоҷикистон низ дар ин чорабинии бонуфуз иштирок намуда, кишвари худро бо ифтихор муаррифӣ кард. Қобили зикр аст, ки даври ниҳоии олимпиада аз 24 то 30 марти соли ҷорӣ идома ёфта, роҳбарияти Маркази ҷумҳуриявии дарёфт ва рушди истеъдодҳо дар ин сафар дастаи кишварро ҳамроҳӣ ва дастгирӣ менамояд.
Ба дастаҳои Тоҷикистон барору комёбӣ ва дастовардҳои назаррас таманно дорем!
Дар шаҳри Куала-Лумпури Ҷумҳурии Малайзия аз 24 то 30-юми марти соли равон даври ниҳоии олимпиадаи байналмилалии «Brainiacs-2026» бо иштироки зиёда аз 20 давлати дунё ҷараён гирифт.
Боиси ифтихор аст, ки дар ҳайати дастаи мунтахаби Тоҷикистон дар олимпиадаи мазкур ду нафар хонандагони синфи 3-и муассиса Ҳамидов Муҳаммадамин ва Ризозода Билол зери роҳбарии директори муассиса Аминзода Муслиҳиддин фаъолона иштирок варзиданд.
Ба Ҳамидов Муҳаммадамин хонандаи синфи 3 «А»-и муассиса муяссар гардид, ки дар даври ниҳоии олимпиада аз фанни математика байни хонандагони синфҳои 3-4 аз рӯи категорияи якум сазовори зинаи III-юм гардад. Ҳамзамон, Ризозода Билол хонандаи синфи 3 «В» аз рӯи ҳамин категория сазовори ҷойи ифтихорӣ гардида, шарафи меҳанро дар арсаи байналмилалӣ баланд бардоштанд.
Дастоварди сатҳи ҷаҳониро ба ҳайати коллективи омӯзгорони муассиса, падару модарон ва хонандагони муассиса шодбош мегӯем!
Санаи 26-уми майи соли равон, дар толори фарҳангии муассиса бо иштироки маъмурият, омӯзгорон, падару модарон, ғолибони даври ҷумҳуриявии олимпиадаҳои фаннӣ ва ғолибони даври ниҳоии озмунҳои шаҳриву ҷумҳуриявӣ маросими ҳавасмандгардонӣ ба як шукӯҳу шаҳомати хосса баргузор гардид.
Маросим бо садо додани Суруди миллӣ оғоз ёфта, намоиши видео-ролики натиҷаву дастовардҳои муассиса дар соли таҳсили 2025-2026 ва чорабинии фарҳангӣ пешкаши ҳозирин гардид. Сипас, сухани табрикотиву ифтиттоҳии директори муассиса шунида шуда, хонандагони лаёқатмандро ҷиҳати дар озмуну олимпиадаҳои сатҳи шаҳриву ҷумҳуриявӣ ва байналмилалӣ пирӯз гардиданашон табрику муборакбод намуда, ба волидони онҳо барои ҳамкориҳои судманд ва масъулияти баланд изҳори сипос намуд.
Маросими ҳавасмандгардонӣ аз рӯи 5 номинатсия: «Ҳавасмандгардонии омӯзгорони фаъоли муассиса» дар даври ҷумҳуриявии олимпиадаҳои фаннӣ; «Ҳавасмандгардонии падару модарон ва ғолибони озмунҳои ҷумҳуриявӣ»; «Ҳавасмандгардонии падару модарон ва ғолибони олимпиадаи ҷумҳуриявӣ»; «Ҳавасмандгардонии падару модарон ва ғолибони озмунҳои шаҳрӣ» ва «Ҳавасмандгардонии падару модарон ва ғолибони даври ниҳоии Олимпиадаҳои байналмилалӣ» баргузор гардид.
Дар идома, ба ғолибони олимпиадаи ҷумҳуриявию байналмилалӣ ва озмунҳои шаҳриву ҷумҳуриявӣ аз ҷониби роҳбарияти муассиса «Ифтихорнома» ва тӯҳфаҳои хотиравӣ ва ба падару модарон ва омӯзгорони онҳо «Сипосномаҳо»-и муассиса тақдим карда шуд.
Маврид ба ёдоварист, ки дастовардҳои муассиса сол то сол дар озмуну олимпиадаҳои сатҳи шаҳриву ҷумҳуриявӣ афзун гардида, мақоми литсей дар баробари муассисаҳои пешсафи самти ҳаракати олимпӣ меафзояд. Соли ҷорӣ хонандагони литсей маротибаи дуюм паиҳам ба «10-гонаи беҳтарин муассисаҳои типи нав: литсей ва гимназияҳои пойтахт» дар самти ҳаракати олимпӣ шомил гардида, дар тамоми озмунҳои шаҳрии «Ту қалби Тоҷикистонӣ, Душанбе», «Тоҷи сари ҷумла ҳунарҳост илм» ва «Забон донӣ — ҷаҳон донӣ» ва озмуни ҷумҳуриявии «Фурӯғи субҳи доноӣ — китоб аст» соҳибмақом гардид. Ин ҳама аз заҳмату толоши шабонарӯзии омӯзгорон ва хонандагони муассиса мебошад, ки дар ҷодаи илм камарӣ ҳиммат бастаанд ва заҳмату талошҳои онҳо аз марази роҳбарияти муассиса дур намонда, аз ҷиҳати моддӣ ва маънавӣ пайваста дастгирӣ меёбанд.
Суратгузориш аз ҷараёни ҳавасмандгардонӣ!
Имрӯз, 6-уми май, дар толори Мақомоти иҷроияи ҳокимияти давлатии ноҳияи Шоҳмансур, Маросими ҷоизасупории ғолибони даври дуюм (ноҳиявӣ)-и Озмуни ҷумҳуриявии «Шоҳномахонӣ, бо иштироки муовини Раиси ноҳияи Шоҳмансур, сарпарасти соҳа муҳтарам Зуҳурзода Зарина баргузор гардид.
Боиси ифтихор ва сарфарозист, ки хонандагони муассиса бо як истеъдоди баланд ва маҳорати хосса дар озмуни мазкур иштирок намуда, сазовори 5 (панҷ) ҷойи ифтихорӣ гардиданд. Аз ҷумла, 1 ҷойи аввал, 2 ҷойи дуюм ва 2 ҷойи сеюмро ба даст оварданд, ки ба ин тариқ, аз рӯи маҷмӯи ҷойҳои бадастоварда, муассиса дар ноҳияи Шоҳмансур дар мақоми аввал қарор гирифт.
Ба ғолибони озмун, имрӯз дар маросими ҷоизасупорӣ аз тарафи кумитаи тадорукот диплом ва мукофотпулӣ барои ҷойҳои I-ум 1500 сомонӣ, барои ҷойҳои II-юм 1200 сомонӣ ва барои ҷойҳои III-юм 1000 сомонӣ тақдим карда шуд. Ҳамзамон, ба омӯзгорони онҳо низ бо ин тартиб мукофотпулиҳо супорида шуд.
Дастоварди назаррасу хонандагон ва омӯзгорони муассисаро шодбош гуфта, ба ғолибон дар даври шаҳрӣ барору комёбӣ ва музаффариятҳои навбатиро таманно дорем!
Ғолибони муассиса дар даври ноҳиявии Озмуни ҷумҳуриявии «Шоҳномахонӣ» дар соли 2026:
Самизода Румайсо, синфи 3 «В»;
Ҷураева Фотима, синфи 10 «В»
Саломатова Шифо, синфи 9 «Б”;
Ҳомидова Осия, синфи 4 «Ё»;
Гулбаҳори Бахтиёр, синфи 9 «В».
Санаи 30-юми апрел, дар толори Мақомоти иҷроияи ҳокимияти давлатии ноҳияи Шоҳмансур, Маросими ҷоизасупории ғолибони даври ноҳиявии озмунҳои шаҳрии «Тоҷи сари ҷумла ҳунарҳост илм» ва «Забон донӣ — ҷаҳон донӣ» бо иштироки муовини Раиси ноҳия муҳтарам Зуҳурзода Зарина Ҳабибулло ва мудири шуъбаи маориф Бобозода Асомиддин Ҳасан баргузор гардид.
Маврид ба тазаккур аст, ки хонандагони муассиса дар даври ноҳиявии Озмунҳои шаҳрӣ фаъолона ширкат варзида, ба гирифтани ҷойҳои ифтихорӣ ноил гардидан. Ҳамин тариқ, дар даври ноҳиявии Озмунҳои шаҳрии «Тоҷи сари ҷумла ҳунарҳост илм» ба гирифтани 4-ҷойи ифтихорӣ аз рӯи чор номинатсия ва «Забон донӣ — ҷаҳон донӣ» ба гирифтани 2-ҷойи ифтихорӣ шарафёб гардиданд.
Ба ғолибон дар маросими ҷоизасупорӣ аз тарафи кумитаи тадорукот ҷом, диплом ва мукофотпулӣ ва ба омӯзгорони онҳо диплом ва мукофотпулии Мақомоти иҷроияи ҳокимияти давлатии ноҳияи Шоҳмансур тақдим карда шуд.
Бояд қайд намуд, ки озмунҳои мазкур соли ҷорӣ тибқи қарори дахлдори Раиси шаҳри Душанбе роҳандозӣ гардида, бо мақсади ҷалби оммавии хонандагон ба забономӯзӣ, ҷалби хонандагони муассисаҳои таълимӣ ба омӯзиши амиқи фанҳои риёзӣ, дақиқ ва табиӣ, дарёфт, муаррифӣ ва ҳавасмандгардонии истеъдодҳои нав дар ин самт равона карда шудаст.
Дастоварди навбатии муассисаро ба тамоми омӯзгорону кормандон, падару модарон ва хонандагони муассиса шодбош гуфта, ба ғолибон дар даври шаҳрии озмун барору комёбӣ ва муҳаффариятҳои нав ба навро таманно дорем!
«ТОҶИ САРИ ҶУМЛА ҲУНАРҲОСТ ИЛМ»
Фатҳуллоева Тавҳида, синфи 9 «А»;
Номинатсия: Табиатшиносӣ.
Назарова Мунира, синфи 10 «А»,
Номинатсия: Радио-эллектроника.
Гулбаҳори Бахтиёр, синфи 9 «В»,
Номинатсия: Сайёҳӣ-кишваршиносӣ.
Маҳмадуллоев Муҳаммад, синфи 11 «А»,
Номинатсия: Моделсозӣ.
«ЗАБОН ДОНӢ — ҶАҲОН ДОНӢ»
(байни синфҳои 9-11)
Латипова Оиша, синфи 10 «В»;
Ҷураева Фотима, синфи 10 «В»
Бо дастгирӣ ва таваҷҷуҳи доимии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон Эмомалӣ Раҳмон ҷиҳати рушди соҳаи маориф ва илм дар Ҷумҳурии Тоҷикистон ва мутобиқ намудани низоми таҳсилот ба меъёрҳои байналмилалӣ тадбирҳои муҳиму саривақтӣ амалӣ гардида истодаанд. Яке аз чунин иқдомҳои муҳим иштироки кишвар дар арзёбиҳои байналмилалӣ, аз ҷумла арзёбии PIRLS — 2026 мебошад.
Дар идомаи баргузории давраи асосии арзёбии байналмилалии PIRLS — 2026 миёни хонандагони синфҳои 4-ум, ки аз 14 апрел то 6 майи соли ҷорӣ дар 171 муассисаи таҳсилоти умумии 52 шаҳру ноҳияҳои ҷумҳурӣ ба нақша гирифта шудааст, имрӯз, 17 апрели соли 2026 вазири маориф ва илми Ҷумҳурии Тоҷикистон Раҳим Саидзода, муовини вазири маориф ва илм Б. Музаффарзода, директори Маркази миллии тестии назди Президенти Ҷумҳурии Тоҷикистон С. Ҷаъфарзода, сардори Сарраёсати маорифи шаҳри Душанбе, намояндагони лоиҳаи «Муҳити таълим – асоси таҳсилоти босифат» ва дигар шахсони масъул дар Муассисаи давлатии таълимии «Литсейи №4 барои хонандагони болаёқати шаҳри Душанбе» иштирок намуданд.
Татбиқи арзёбии PIRLS — 2026 дар доираи лоиҳаи «Муҳити таълим – асоси таҳсилоти босифат» ба таври самаранок ба роҳ монда шуда, ҳадафи он фароҳам овардани шароити мусоиди таълимӣ, такмили муҳити омӯзиш ва баланд бардоштани сатҳи дастрасии хонандагон ба захираҳои таълимӣ мебошад. Дар ин замина, истифодаи усулҳои муосири таълим, технологияҳои иттилоотӣ ва рушди қобилияти тафаккури интиқодии хонандагон низ тақвият дода мешавад.
Зикр гардид, ки натиҷаҳои арзёбии PIRLS — 2026 барои муайян намудани вазъи воқеии сатҳи саводнокии хонандагон, такмили барномаҳои таълимӣ ва таҳияи сиёсати минбаъдаи соҳа заминаи муҳим фароҳам меоранд. Ҳамзамон, ин раванд имконият медиҳад, ки Ҷумҳурии Тоҷикистон мавқеи худро дар муқоиса бо кишварҳои дигар муайян намуда, таҷрибаи пешқадамро дар низоми миллии маориф ҷорӣ намояд.
Дар маҷмӯъ, иштироки фаъолона дар арзёбиҳои байналмилалӣ ва татбиқи лоиҳаҳои инноватсионӣ бозгӯи таваҷҷуҳи пайвастаи роҳбарияти давлат ва Ҳукумати кишвар ба рушди устувори соҳаи маориф ва баланд бардоштани сифати таҳсилот дар Ҷумҳурии Тоҷикистон арзёбӣ мегардад
АСОСГУЗОРИ СУЛҲУ ВАҲДАТИ МИЛЛӢ-ПЕШВОИ МИЛЛАТ
